Wednesday, June 1, 2011

اربع سنين طالب جامعي، اتعلمت فيهم ايه ؟


المادة الواحدة في الترم عبارة عن 12 محاضرة كل محاضرة 3 ساعات وسكاشن على جمب. بس انسى السكاشن شوية كدة وفكر معايا، تخيل انك حتاخد ال12 محاضرة بدل مرة في الاسبوع، لأ مرة في اليوم… لو قلنا الاسبوع 6 ايام يبقى كدة حتخلص المادة في اسبوعين، صح ؟

كلام جميل. قول بقى انك حتاخد 3 مواد، يعني 3 محاضرات كل يوم، 6 ايام في الأسبوع. كدة في اسبوعين تبقى خلصت 3 مواد. طيب المفروض عشان تتخرج من الكلية تاخد حوالي ما بين 5 او 6 مواد كل ترم، خليهم 5، يعني حوالي 40 مادة. كدة يبقى حتخلصهم في اد ايه ؟ 3 مواد كل اسبوعين، يعني 6 مواد في الشهر، 40 على 6 فيها ال … ثانية اجيب الالة الحاسبة؛ اصلي مش حافظ جدول الضرب … الظاهر 6 شهور وشوية، قول 7 شهور. ده من غير راحة خالص وتنزل 6 ايام في الاسبوع كل يوم 9 ساعات محاضرات غير المواصلات…

تخيل بقى انك عاوز تدرس كل مواد الرياضيات بتاعة قسم رياضة في كلية علوم وكمان كل مواد الفيزياء اللي في كلية علوم. معرفش بصراحة هم كام كورس بس الأكيد ان في مواد كتيرة مشتركة بينهم وبين بعض وبين علوم الحاسب. المهم لو انت قررت تدرس كل المقررات ديه، ممكن الموضوع يندمج والحاجات المشتركة تتلاشى وتقضيها كلها في اقل من 21 شهر؛ قول مثلا 16 شهر بس.

برضه مكملناش 4 سنين. طب فاضل ايه، قول انك حتاخد كل مواد تمهيدي ماجستير في علوم الحاسب والرياضيات والفيزياء، تمهيدي الماجستير سنة، يعني المجموع حوالي 30 مادة لو مفيش مكرر، يبقى كدة حوالي 5 شهور. كدة المجموع كلة 21 شهر.

طب وبعدين ؟ 21 شهر يعني حتى مكملناش سنتين… ده حتى اللي بيتجند ظابط بيقضي وقت اكتر من كدة (وبرضه شغال 6 ايام في الاسبوع!)…

اقولك في السنتين اللي بعدهم قضيها في رسالة ماجستير بس تكون تقيلة، منت دارس 3 تخصصات تقال اهو…

وكدة بقوا 4 سنين،،،

بس اربع سنين عن اربع سنين تفرق، مبروك عليك الشهادة يا خريج يا جديد ….

1 comment:

Omar said...

Howa da elly et3alemto? ady a5ret el ta3lem el magany :P:P