Wednesday, August 6, 2008

حيرة

انا محتار
وانتا بتبدأ حياتك بعد التخرج بتلاقي اختيارات كتير اوي خصوصاً في مجالنا
يعني مثلا اشتغل ده ولا ده
بلاش
اشتغل اللي بحبة واتبهدل ولا اشتغل اللي مبحهوش واستقر ؟
طب انا بحب ايه اصلا ؟
وهل لو اشتغلت اللي بحبه حفضل احبه كمان كام سنة ؟
طب هو اني اشتغل اللي انا بحبه يسوى البهدلة ؟
قصدي هل حاجي كمان عشرة خمستاشر سنة واندم على اختياري ؟
لو اخيتاري للشغل اللي انا بحبه يعني اني اضيع سنين الله أعلم كام من عمري في الدراسة في دولة غريبة مع ناس غريبة وفي الاخر محوكنش كونت نفسي او استقريت ؟
طب ولو ضحيت بالسنين دي بعدها حفرق حاجة عن اللي قعد هنا واشتغل هنا واترستق ؟
يا ترى بعيد عن الجزئية دي هو غلط اني محاولش ابني مهاراتي التجارية والادارية -البحتة؟ مش قصدي ادارة انك تدير فريق قصدي ادارة انك تكون رجل اعمال ملكش دعوة بالتقنية
مرة سمعت مقولة انك المفروض تحاسب من احلامك عشان ممكن تتحقق.. هل انا فعلا خايف من اللي انا عاوزه ؟
ممكن نحاول نعمل حسبة بسيطه اعترف اني اول مرة احسبها وانا بكتب هذه السطور
لو قلنا مثلا سنتين ماجستير على تلات اربع سنين دكتوراه كده مثلا بقيت تلاتين سنة !!ـ
طب بعد مخلص الدكتوراه حيبقي شغلي عامل ازاي وفين ومستوايا عامل ازاي . الأكيد اني احتمال كبير مش حكون استقريت ولسه حدور على شغل بعد كده في مكان تاني والله اعلم طبعاً بس انا مش متخيل اني اكمل شغل في نقس الحاجة اللي كنت شغال فيها قبل الدكتوراة مثلاً
افرض اني بدأت شغل -على اساس اني استقر- بعد ما بقيت ٣٠ سنة ... عشان اكون نفسي حياخد مني وقت قد ايه ؟ قول خمس ست سنين ادي ٣٦ سنه.. ـ
في المقابل ان الناس اللي مش حيسلك نفس طريقي وحيكمل هنا في حاجة غالبا مش بيحبها وكمان حيبعد عن التقنية كلها في خلال ١٠ سنين على الاكتر حيكون وصل المرحلة دي وهو على ٢٧ ولو من غير جيش يبقى على ٢٦.. فرق ١٠ سنين...ـ
طب ليه اعمل في نفسي كده ؟
والله الحاجة الوحيدة اللى بحاول اقنع بيها نفسي ان بعد كل ده حيكون فاضل ٢٥ سنة لحد المعاش هو حيكون مش طايق الشغل وانا حكون رايح الشغل وانا مبسوط -غالباً يعني..!!ـ
ده غير ان انا حكون بعمل حاجة ليها عائد نفسي اني بفيد العلم بحاجة لكن هو بيعمل اللي العميل بيقوله عليه وخلاص والعميل طبعاً على حق !ـ
وبرضة المفروض ان شاء الله ان اللي معايا في الشغل ناس بتفكر ناس بتفهم ناس عاوزة تعمل حاجة، لكن اللي معاه في الشغل ناس حفظت الدوت نت فريم وورك وبيسمعوه في الكود وخلاص عشان ياخدوا قرشين ويروحوا -لا اهانة للناس دي ولا للدوت نت فريم وورك-ـ
هو صحيح مش كل الشغل حيبقى على مزاجي لكن على الاقل الجزء اللي مش على مزاجي برضة في تفكير
السؤال بقى هل في اثار جانبية هل في حاجات معملتش حسابها ؟ هل ده فعلاً اللي حيحصل ؟ والله اعلم طبعاً
على المدى القصير انا عارف اني مش حستحمل الديفلوبمنت العادية... ححس انها تضييع لوقتي حيث ان انا عارف انا ممكن اضيع وقتي في حاجات احسن !ـ
وبما ان انا جربت الداتا انتري فانا عارف احساسي حيبقى عامل ازاي...!!!!ـ
وعلى المدى القصير برضه، الشغل اللي انا بحبه رغم انه بالنسبة لي لذيذ وتفكير وكده بس فحت فحت فحت خصوصاً في البداية الكام سنة الاولنيين.ـ
قرار صعب اوي
خصوصا انه غير قابل للرجعة فيه الا بخسائر كبيرة - من ناحية السنين-ـ
يعني لو خدت قرار وبدأت فيه لازم اكمل فيه...ـ
في كمان اعتبارات تانية
الناحية الاجتماعية لما ارجع بعد ١٠ سنين مثلاً ان شاء الله حيكون اللي هاجر هاجر واللي نسي نسي واللي اتغير اتغير وخصوصا ان انا برضة مليش حد اوي هنا
حتكون حاجة صعبة اول عليا
خصوصا اني حكون لسة راجع من غربة ووحدة فظيعة
مش عارف
انا قلت كل اللي في قلبي
لعل وعسى حد يقرا الكلام دي ويلاحظ حاجة انا مكنتش واخد بالي منها او يديني نصيحة او يفكر معايا
انا بس مش عاوز العمر يعدي وتفوتني فرصة اني اكون عملت حاجة انا مش عاوز اقضي حياتي اروح شغل اخد فلوس اروح البيت مخنوق، انا عاوزها اكتر تكون اني رايح الشغل كانه هواية حاجة انا فعلا عاوز اعملها، اعمل حاجة مفيدة للعلم والمجتمع، اخد فلوس برضه بس مش حروح مخنوق
انا دايماً بفكر في حتة العمر دي لما الاقي حد طلع معاش
او اشوف حد كبير
اقول طب ده جه وراح وفي الاخر مزودش حاجة
يبقى لازمته ايه ؟
انا نظرتي للانسان انه وظيفتة في الحياة مش انه يشتغل ويجيب فلوس وسلامو عليكو
لا الانسان في نظري موجود عشان لكل جيل جديد الدنيا تبقى احسن مش بس ماديا لكن نفسيا، الناس تحترم بعض اكتر مثلا
لو فكرنا فيها انه مثلا الانسان ده زي النمل
في صخرة كبييييرة
كل نملة تيجي تدي زقة وتمشي
بعد اجيال كتييير حتلافي الصخرة اتحركت والنمل عرف يطلع
لكن تلاقة نملة مستفزة راكنة على الصخرة بتشرب سيجارة بكل برود ويعد كدة تمشي
اهه هي دي نظرتي للانسان اللي جه وراح ومزودش حاجة
ممكن واحد يكون زود حاجة طول مهو عايش لكن اول ما راح الحاجة دي خلصت مثلا مصنع والمصنع ده قفل عشان محدش عرف يشغله صح عشان هو معلمش حد ازاي يستعلمه او يحسنة او يضيف ليه
ده برضه زيه زي اللي معملش حاجة
الانسان عشان يكون عمل حاجة يبقى لازم يكون اضاف للي حواليه حاجة يستفيدوا بيها من بعدة او من غيره.. علم، احترام الاخرين،
attitude
طريقة تفكير
من الاخر يعني
عرف يدي زقة للبشرية والصخرة اتحركت فعلا
التاني ده عامل زي ما يكون رفع الصخرة سنّة وقامت راجعة تاني اول ما سابها
انا حاسس اني طولت عليكوا
وفعلا دي اطول بوست ليا بالعربي بس اول مرة اتكلم من القلب كده على البلوج
وعموماً احب اشكر القارئ انه كتر خيرة صبر عليا وكمل معايا لحد هنا
مش عارف اقفل البوست ازاي بصراحة
خلاص البوست خلصت.......ـ