Follow by Email

Sunday, September 16, 2007

نقطه تحول


في حياه كل واحد فينا بتبقى في نقط معينه في حياته بتعبر عن تغييرات ضخمه في شخصيته. احيانا بتبقى النقط سببها تغيير في الظروف او الاحداث المحيطه بالواحد. مثلا على اعتاب مرحله جديده في حياته او نتاج تجربه معينه اثرت فيه او نتاج سلسله احداث سببت ظروف صعبه.
اكيد مثلا مرحله الجامعه ديه اثرت في كل واحد فينا تأثير كبير اوى مش حاقول اعادت كتابه شخصيتنا كلها.
انا بكتب التدوينه ديه عشان في نقطه تحول احتمال تأثر على تدويني كمان. اللي ملاحظ انا بقالي فتره مش بكتب كتير ( قال يعني كنت بألف كتب قبل كده :D ). بس في الواقع انا بقالي فتره بفكر احول اكتب عربي و كمان اكتب كلام عادي - يعني مش تقني.
للأسف الكلام العادي اللي انا عاوز اكتبه مش حأحس براحه الأ وانا مش معروف انا مين. بصراحه انا مكنتش بكتب غير تقني مش عشان معنديش حاجه تانيه اقولها و لكن عشان مش ببقى براحتي وانا مش عارف مين اللي ممكن يقرا الكلام اللي انا بكتبه.
و لما شفت مجتمع المدونين - خاصه المصريين - لقين ان نسبه كبيره منهم مش معروف شخصياتهم و انا حسيت ان ده بيدي حريه اكتر في الكلام. اه يعني القارئ احسن مني في ايه انه يكون عارف انا مين وانا اساسا معرفش انه قرا التدوينه, مش كده لازم يكون في عدل لازم يكون في مساواه ( مش المساواه التانيه قصدي المساواه بين القارئ والكاتب)
عشان كده قررت اخيرا اني اشارك في مجتمع المدونين المجهولين. و عشان كده برضه مش حابعت العنوان لحد نهائي.
بيتهيألي كده كفايه حد عنده سؤال ؟,

7 comments:

Ahmed Mubarak said...

يا مستر نبيل
أولا كل سنة وانت طيب

وحلو انك تكتب بالعربي..وبساطة بعيدة عن التيكنيكال..بس عندي وجة نظر
على فكرة..أنا شايف انك تكتب تدوينة انت مش معروف انت فيها..انت بتختفي ..وراها..أكتب الي انت عايزة وميهمكش حد..ما دام انت بتتكلم صح..

بس لو انت شايف انك هطلع الي جواك..بالطريقة دية..توكل على الله

Mohammad Nabil Al-Aggan said...

وانت بالصحه والسلامه

مس مسأله بختفي وراها, دي مسأله ان انا حكون بقول معلومات عن نفسي ممكن حد يستخدمها ضدي. انا لو مع صحابي فل لكن حد معرفوش يبقى لازم احرص. ولا ايه ؟

Ahmed Essawy said...

الي يريحك يا نبيل .... بس انت ناصح قوي ...
:D
انا عارف عنك كتير و مهما تستخبي ورا بلوج حكون عارفك ...
اعتقد انك مفروض كنت تظهر بالشخصيه دي من غير ما تقول ...
====
الي فاتت دي كانت اول حاجه..
تاني حاجه انا شخصيا ...مش مقتنع باللي بيعملو مجتمع المدونين المصرين في انهم يستخبو ورا شخصيه...
ليه الواحد يهرب من نفسه...
انا اعرف ناس بقو بيحسو انهم بشخصيتين..واحده في البيت و واحده علي النت...
كترتها بتخلي الواحد يبعد عن نفسه خاصه لو الشخصيه المجهوله عجبتك اكتر ..
و الله مش هزار ...انا اعرف ناس كدا ...
الانخراط في مجتمع البلوجات ...عالم تاني ...
ببشر تانيه و صوت تاني
....
لو اتسحبت فيه ... بشكل مبالغ فيه... حيخليك تتخلي عن معظم اصحابك ...
لانك حتلاقي طريقه تانيه بتفرغ فيه الي انت عايز تقولو ...
اعتقد دي مشكله اصحابك و انت معاهم الي خلوك توصل للنقطه دي ...
الفرق الوحيد بين اصحابك الي في الحقيقه و اصحابك المجهولين زيك ...انت وقت الزنقه..او في اي ظرف تحتاج حد فيه ... مش حتلاقي اصحابك المجهولين فيه...

Mohammad Nabil Al-Aggan said...

شكرا على الرد :)
انا مش بعمل كده عشان اسيب صحابي ولا عشان اصاحب ناس معرفهومش. ما هي الا تجربه اعرف بيها نفسي اكتر.
و ممكن مين يعرف في يوم من الايام اكشف عن البلوج ده.

MeshMesh said...

Great Mohammed Nice Start (to start writing Non technical as well ...although they'll not be the 1st ..u already have a few non-technical posts hidden behind the technical ones loool :D) but by the way , writing non-technical stuff..like things u wonder about , observe , life concepts and such lets people whether known or unknown get influenced by what u write(and perhaps that could make up their day) and the more influenced the people , perhaps the more this blog counts as a way to win +ves (7asanat) or more probably takfeer saye2aat ...so there are lots of general things u can tell us about from ur perspective ...which will reflect ur character in a +ve way, and in what will others then use this against u? Almost , Nothing I assume (Just count gains against losses and if gains won ..then go for it and share with us ;) )

Zo0oZ said...

السلام عليكم

اتفق في الرأي مع أحمد عيسوي

و لو خايف - زي ما بتقول - انك تكتب معلومات حد يستخدمها ضدك .. خليك فاكر و انت بتكتب انك مش ضروري تعترف بنقاط ضعفك بشكل صريح .. و الاحسن انك حتى لو قلت حاجات عن شخصيتك تكون - من قبلها - مواجهها مع نفسك و عارف كل حاجه فيك ايه المقابل لها عندك يقدر يقوّيك عليها

في كل الاحوال اعتقد انك هتلاقي ردود تشاركك الاراء .. و هاتكون أوضح لنفسك قبل الناس وده بيزيد ثقتك في نفسك اكتر و اكتر و بيكون مريح مع الوقت

اعتذر للاطالة

Mohammad Nabil Al-Aggan said...

بما ان معظم الاصدقاء الذي احترم رأيهم قد اجمعوا على ذلك
فسوف اجرب مقاله واحده و اشوف ايه تأثيرها
بصراحه خوفي الكبير ان شكلي يطلع اهبل .. ربنا يستر