Follow by Email

Thursday, December 30, 2010

New post


حاليا انا في اجازة فاضلها ٤ ايام وتخلص ومش لاقي حاجة اعملها وزهقان فقلت اكتب مقالة اقرفكوا بيها معايا - على افتراض ان انتوا حتقروا يعني ـ احسن ما اقعد اكلم في نفسي وخلاص
احيانا تتدفق الأفكار في رأسي، سواء افكار سياسية او اجتماعية او تكنولوجية
بس انا اكنت حابب اخد الاجازة ديه اروق فيها دماغي شوية عشان انا تقلت عليها حبتين الفترة اللي فاتت في الشغل عشان انسى مشاكلي وهمومي
في افكار تانية كتيرة خطرت على بالي في الاجازة، دماغي مش عاوزة تستريح، بس عموما كلها افكار مختلطة بمشاعر والخليط ده صعب يتكتب
يعني مثلا لو على افكار اصلاح البلد بتلاقي مشاعر كتيرة داخله في الموضوع بدءا من الاحباط وإنتهاءا بالتحدي
او يمكن بدءأ بفقدان الأمل والزهق والهرب وانتهاءا الي الرضا والصبر والمقاومة
في جزئين ناقحين عليا مؤخرا في موضوع اصلاح البلد ده، رغم اني بحاول اغطي كل الأجزاء بس ميمنعش اني اناقش دول دلوقتي طالما كدة كدة مش فارقة في اللحظة ديه
اول جزء هو مبدأ ان الإصلاح مش اصلاح البلد ولا اصلاح الخدمات ولا التعليم ولا الطرق، لكن هو اصلاح الناس
يعني مثلا لو انت مسكت منصب متجيش تهزأ الناس اللي تحتك لما يغلطوا وتعاقبهم وتجيب ناس تانية تعمل اللي في دماغك
الأهم من كدة انك تعلمهم وتلهمهم
تعلمهم ازاي يصحلوا وتلهمهم يصلحوا ايه وليه
واهم من كدة تفهمهم ازاي يصلحوا الناس اللي تحتهم برضه و يصلحوا المجتمع اللي حواليهم
لكن مجرد انك تعاقب واحد لو غلط اللي حيحصل انك حتجيب ناس، من الآخر، روبوت، تنفذ وخلاص ، ويوم ما انت تروح قول على الاصلاح السلام، مهو ان غاب القط، العب يا فار


تاني جزء هو ان الفرق في العلم عمال يكبر عن ما كان ممكن يحصل زمان
يعني ايه اخر الفرق في التكنولوجيا زمان ؟ سيف من الحديد بدل سيف من النحاس ؟؟
ولا منجنيق بدل النبلة ؟
الموضوع دلوقتي ملوش علاقة بالادوات ولا التصنيع للأسف
لما الواحد ييجي يشوف اللي بيحصل في مناهج الرياضة برة عن هنا يلاقي ان فعلا كأنها غرباء من كوكب آخر واحنا لسة يا دوب كوكب غلبان ملوش في حاجة خالص
الجديد عامة في الفرق ده انه عمال يكبر وصعب جدا ان احنا نقفله في فترة قليلة
يعني السلاح ممكن نهربه او نشتريه
لكن العلم حنعمل فيه ايه ؟
تخيل مثلا واحد جالك من القرن ال11 مثلا قالك عاوزك تعلمني ازاي اعمل عربية عشان احارب بيها
حتضحك عليه وتقوله دلوقتي في طيارات، حيقولك يعني ايه ؟؟
كأنك بتحاول تعلم تفاضل وتكامل لواحد ميعرفش يعني اي دوال اصلا
يعني الفرق في العلم بينا وبينها بقى عامل زي الفرق في قرون كاملة من العلم ازاي حتخلي واحد يتخطى او يتعلم قرون من الفرق بسهولة ؟
والمشكلة ان الفرق عمال بيكبر واحنا قاعدين فرحانين بكادر المعلمين ....

المقالة ديه مش هدفها الشكوى من غير اساس ولا حل
انا هدفي من المقالة اني اضيع وقتي (ووقتكوا) وانكد عليكوا شوية
اما هدفي التاني اني اشارك مش بس تفكيري لكن برضه احاسيسي
في اللي فوق ممكن تلاقي احاسيس المثابرة احيانا واحيانا اخرى تلاقي احاسيس الرعب
في الآخر ديه البلوج بتاعتي يعني عني انا مش عن حاجة تانية ولو مش عاجبك متقراش .. ايه الناس ديه

No comments: