Follow by Email

Wednesday, August 6, 2008

حيرة

انا محتار
وانتا بتبدأ حياتك بعد التخرج بتلاقي اختيارات كتير اوي خصوصاً في مجالنا
يعني مثلا اشتغل ده ولا ده
بلاش
اشتغل اللي بحبة واتبهدل ولا اشتغل اللي مبحهوش واستقر ؟
طب انا بحب ايه اصلا ؟
وهل لو اشتغلت اللي بحبه حفضل احبه كمان كام سنة ؟
طب هو اني اشتغل اللي انا بحبه يسوى البهدلة ؟
قصدي هل حاجي كمان عشرة خمستاشر سنة واندم على اختياري ؟
لو اخيتاري للشغل اللي انا بحبه يعني اني اضيع سنين الله أعلم كام من عمري في الدراسة في دولة غريبة مع ناس غريبة وفي الاخر محوكنش كونت نفسي او استقريت ؟
طب ولو ضحيت بالسنين دي بعدها حفرق حاجة عن اللي قعد هنا واشتغل هنا واترستق ؟
يا ترى بعيد عن الجزئية دي هو غلط اني محاولش ابني مهاراتي التجارية والادارية -البحتة؟ مش قصدي ادارة انك تدير فريق قصدي ادارة انك تكون رجل اعمال ملكش دعوة بالتقنية
مرة سمعت مقولة انك المفروض تحاسب من احلامك عشان ممكن تتحقق.. هل انا فعلا خايف من اللي انا عاوزه ؟
ممكن نحاول نعمل حسبة بسيطه اعترف اني اول مرة احسبها وانا بكتب هذه السطور
لو قلنا مثلا سنتين ماجستير على تلات اربع سنين دكتوراه كده مثلا بقيت تلاتين سنة !!ـ
طب بعد مخلص الدكتوراه حيبقي شغلي عامل ازاي وفين ومستوايا عامل ازاي . الأكيد اني احتمال كبير مش حكون استقريت ولسه حدور على شغل بعد كده في مكان تاني والله اعلم طبعاً بس انا مش متخيل اني اكمل شغل في نقس الحاجة اللي كنت شغال فيها قبل الدكتوراة مثلاً
افرض اني بدأت شغل -على اساس اني استقر- بعد ما بقيت ٣٠ سنة ... عشان اكون نفسي حياخد مني وقت قد ايه ؟ قول خمس ست سنين ادي ٣٦ سنه.. ـ
في المقابل ان الناس اللي مش حيسلك نفس طريقي وحيكمل هنا في حاجة غالبا مش بيحبها وكمان حيبعد عن التقنية كلها في خلال ١٠ سنين على الاكتر حيكون وصل المرحلة دي وهو على ٢٧ ولو من غير جيش يبقى على ٢٦.. فرق ١٠ سنين...ـ
طب ليه اعمل في نفسي كده ؟
والله الحاجة الوحيدة اللى بحاول اقنع بيها نفسي ان بعد كل ده حيكون فاضل ٢٥ سنة لحد المعاش هو حيكون مش طايق الشغل وانا حكون رايح الشغل وانا مبسوط -غالباً يعني..!!ـ
ده غير ان انا حكون بعمل حاجة ليها عائد نفسي اني بفيد العلم بحاجة لكن هو بيعمل اللي العميل بيقوله عليه وخلاص والعميل طبعاً على حق !ـ
وبرضة المفروض ان شاء الله ان اللي معايا في الشغل ناس بتفكر ناس بتفهم ناس عاوزة تعمل حاجة، لكن اللي معاه في الشغل ناس حفظت الدوت نت فريم وورك وبيسمعوه في الكود وخلاص عشان ياخدوا قرشين ويروحوا -لا اهانة للناس دي ولا للدوت نت فريم وورك-ـ
هو صحيح مش كل الشغل حيبقى على مزاجي لكن على الاقل الجزء اللي مش على مزاجي برضة في تفكير
السؤال بقى هل في اثار جانبية هل في حاجات معملتش حسابها ؟ هل ده فعلاً اللي حيحصل ؟ والله اعلم طبعاً
على المدى القصير انا عارف اني مش حستحمل الديفلوبمنت العادية... ححس انها تضييع لوقتي حيث ان انا عارف انا ممكن اضيع وقتي في حاجات احسن !ـ
وبما ان انا جربت الداتا انتري فانا عارف احساسي حيبقى عامل ازاي...!!!!ـ
وعلى المدى القصير برضه، الشغل اللي انا بحبه رغم انه بالنسبة لي لذيذ وتفكير وكده بس فحت فحت فحت خصوصاً في البداية الكام سنة الاولنيين.ـ
قرار صعب اوي
خصوصا انه غير قابل للرجعة فيه الا بخسائر كبيرة - من ناحية السنين-ـ
يعني لو خدت قرار وبدأت فيه لازم اكمل فيه...ـ
في كمان اعتبارات تانية
الناحية الاجتماعية لما ارجع بعد ١٠ سنين مثلاً ان شاء الله حيكون اللي هاجر هاجر واللي نسي نسي واللي اتغير اتغير وخصوصا ان انا برضة مليش حد اوي هنا
حتكون حاجة صعبة اول عليا
خصوصا اني حكون لسة راجع من غربة ووحدة فظيعة
مش عارف
انا قلت كل اللي في قلبي
لعل وعسى حد يقرا الكلام دي ويلاحظ حاجة انا مكنتش واخد بالي منها او يديني نصيحة او يفكر معايا
انا بس مش عاوز العمر يعدي وتفوتني فرصة اني اكون عملت حاجة انا مش عاوز اقضي حياتي اروح شغل اخد فلوس اروح البيت مخنوق، انا عاوزها اكتر تكون اني رايح الشغل كانه هواية حاجة انا فعلا عاوز اعملها، اعمل حاجة مفيدة للعلم والمجتمع، اخد فلوس برضه بس مش حروح مخنوق
انا دايماً بفكر في حتة العمر دي لما الاقي حد طلع معاش
او اشوف حد كبير
اقول طب ده جه وراح وفي الاخر مزودش حاجة
يبقى لازمته ايه ؟
انا نظرتي للانسان انه وظيفتة في الحياة مش انه يشتغل ويجيب فلوس وسلامو عليكو
لا الانسان في نظري موجود عشان لكل جيل جديد الدنيا تبقى احسن مش بس ماديا لكن نفسيا، الناس تحترم بعض اكتر مثلا
لو فكرنا فيها انه مثلا الانسان ده زي النمل
في صخرة كبييييرة
كل نملة تيجي تدي زقة وتمشي
بعد اجيال كتييير حتلافي الصخرة اتحركت والنمل عرف يطلع
لكن تلاقة نملة مستفزة راكنة على الصخرة بتشرب سيجارة بكل برود ويعد كدة تمشي
اهه هي دي نظرتي للانسان اللي جه وراح ومزودش حاجة
ممكن واحد يكون زود حاجة طول مهو عايش لكن اول ما راح الحاجة دي خلصت مثلا مصنع والمصنع ده قفل عشان محدش عرف يشغله صح عشان هو معلمش حد ازاي يستعلمه او يحسنة او يضيف ليه
ده برضه زيه زي اللي معملش حاجة
الانسان عشان يكون عمل حاجة يبقى لازم يكون اضاف للي حواليه حاجة يستفيدوا بيها من بعدة او من غيره.. علم، احترام الاخرين،
attitude
طريقة تفكير
من الاخر يعني
عرف يدي زقة للبشرية والصخرة اتحركت فعلا
التاني ده عامل زي ما يكون رفع الصخرة سنّة وقامت راجعة تاني اول ما سابها
انا حاسس اني طولت عليكوا
وفعلا دي اطول بوست ليا بالعربي بس اول مرة اتكلم من القلب كده على البلوج
وعموماً احب اشكر القارئ انه كتر خيرة صبر عليا وكمل معايا لحد هنا
مش عارف اقفل البوست ازاي بصراحة
خلاص البوست خلصت.......ـ

4 comments:

BooDy said...

ده كلام كبير اوي :)

مش هكذب عليك و اقول لك اني عندي حل للمشكله دي، أي حد هيقول لك انه لقى الحل هيبقى بيكذب لإن كل واحد له ظروفه الخاصه و له الحل بتاعه هو بس اللي مينفعش لحد غيره. تجربتي انا الشخصيه اللي مقدرش اقول انها ناجحه او فاشله برضو اثبتت لي حاجه واحده بس، ان مفيش أي ثوابت. كل حاجه بتتغير و بسرعه و منغير ما نحس. من قبل ما اتخرج و انا نفسي اكمل في المجال الأكاديمي و بحبه و لغاية دلوقتي بسأل نفسي يا ترى حياتي كانت هتبقى عامله ازاي لو كنت اقدر اروح اتعلم في MIT (كنت و مازلت بحلم بيها لغاية دلوقتي :)). الحمد لله فشلت اني اكمل في مصر لأسباب بيروقراطيه و فشلت اكمل بره مصر لأسباب ماديه و في الآخر رحت للحاجه الأقل شويه في نظري وقتها و بقيت software engineer و علشان مبكتبش غير برمجيات حره فكمان المجالات اللي قدامي قليله في مصر. اربع سنين شغل لغاية دلوقتي و انا بكتب web applications مش ضخمه، صحيح مش صغيره و مش ممله لكن برضو مش ضخمه. بعد اربع سنين و اللي هما مش كتير فعلا و ممكن رأيي ده يتغير كمان كام سنه في حاجه واحده ثابته بس، انا اتخليت عن أي فرصه اني ابقى مستقر و اشتغل في شركه كبيره اوي و البس البدله و انا رايح الشغل كل يوم :) و ابقى ترس في مكنه كبيره و فعلا مبسوط و معدتش علي أي لحظه ندمت فيها لإني عملت حاجه انا بحبها و هي اني بكتب برمجيات حره.

كل حاجه بتتغير حواليك كل يوم، حتى الحاجات اللي بتحبها و الناس اللي بتحبهم و المكان اللي بتحبه. فمش ممكن تتنبأ باللي هيحصل لك كمان عشر سنين او انت هتفكر ازاي وقتها و هيكون تقييمك ايه لوضعك وقتها. متهيأ لي انا مقلتش أي حاجه مفيده لغاية دلوقتي لكن من أولها انا قلت اني معنديش حل فمتزعلش مني :)

ربنا يوفقك :)

Ahmed Essawy said...

يا ريت يا نبيل لو حد رد عليك ابقي قولي ....لاني برضو عايز حد يرد عليا
انا فكرت التفكير دا بس مش للدرجه بتاعتك دي .... و اعتقد ان دا تفكير منطقي لاي حد بيبص ادامه ...
و انا بحكم سنه شغل ...اقدر امسك الميكروفون من العتبه الصغيرة دي لان جزء من الصورة وضح ليا ... انا الواحد بيحلم بحاجات كتير ...و لكن مش معني انو ماشي في اتجاه تفكيرة ..انو حيوصل للاي عايزة ...لان دا بممكن يلاقي نفسه ماشي في طريق تاني ...و نتايج تانيه من نفس الطريق ....
انا بعد سنه شغل عرفت ان الحروب مش لازم تكون بأسلحه ...زي ما امريكا عامله في العراق ...لا انا بشوف ادامي في الشغل كل يوم حروب بتشد و ضحايا اشكال و الوان ...شوفت ناس شغاله بتتذل و شوفت الي مبيعملش حاجه خالص و بيذل و ماسك الحرب ...
انا شوفت ناس بتضحك علي ناس من نفس الشركه و شركات بتوقع شركات ...و شركات عامله نفسها صديقه لشركات ...
الدنيا دي مافيا .... و ملهاش كبير ... و ملهاش قاعده ...
لقمه العيش صعبه و مش سهل ان الواحد يختار الطريقه الي بياكل بيها كمان ...
من الاخر صعب الواحد يحط خطه لحياته بعيده المدي زي اللي بتقولها ... بس دا ميمنعش انها ممكن تتحقق ....المشكله في احتمال تحقيقها ...

انا قريت البوست بتاعك و انا في حاله اساسا مش تمام من ضغط الشغل الرهييب فدا كان اقل حاجه ممكن اقولهالك ...
في الزمن الي احنا فيه دا دور علي شغلانه نحافظ علي اداميتك....
يا رب اكرمنا جميعا للخير ...

Benjamin Geer said...

لو غرضك إنك تدي حاجة مفيدة للبشر يبقى المفروض تدور على أحسن طريقة تستنفد بيها ميزاتك من أجل الغرض دا، حتى لو الاستعداد خد وقت طويل. واضح إن عندك موهبة رائعة، فيبقى عيب لو وفرت شوية سنين وضيعت موهبتك. ماتخافش تختار اتجاه غلط، ممكن تصحح اتجاهك أكتر من مرة في حياتك، دا بيحصك كتير، خصوصا عند الأشخاص اللي الاتجاهات التقليدية ما بتناسبهمش، لإنهم لازم يخترعوا اتجاهات جديدة في حالات كتير.

"The reasonable man adapts himself to the world; the unreasonable one persists in trying to adapt the world to himself. Therefore all progress depends on the unreasonable man." --George Bernard Shaw

Redzo said...

Meemo Miss you So Much ... I Admire this Huge technical Thing :)) ... Finally found something non-technical I've been many times to such a dilemma and it's never over but I put this always in front of my face ...
http://loser-redzo.blogspot.com/2009/01/pursuit-of-happiness.html